تحدثت ياسمين عز في حلقتها الجديدة من برنامج كلام الناس المذاع على شاشة قنوات mbc مصر عن نوع من الرجال الذي لا يجب أن تتزوج الفتيات به، وهو الرجل البخيل، مشيرة إلى أنها ستكون حياتها كالجحيم إذا تزوجت به.

ياسمين عز: اوعي ترتبطي بالراجل البخيل 

وقالت ياسمين عز في تصريحات رصدها موقع تحيا مصر: اوعي ترتبطي بالانواع دي من الرجالة، الراجل البخيل وده بيبان من أول لقاء زي انك تلاقيه بيتعرف عليكي بالتليفون مش المقابلة ولو قرر يخرجك في مكان هيكون سعره مش غالي.

وتابعت: في بنات أما بيخرجوا مع خطيبهم أو حبيبهم بيدفعوا ويقولوا أصل بحبه يا ياسمين.. حبتك الجرادة يا روح قلبي هتاخدي الطبيعة الذكورية منه.. انتي بتعملي في نفسك كارثة يا مدام انتي بتدمري نفسك وأنوثتك، البخيل بتعرفيه من اول لقاء وبتسبيه من أول لقاء ازاي مش بيسقط من نظرك ده رجولته ناقصة.

ياسمين عز تتحدث عن الرجل البخيل 

وأضافت ياسمين عز: حياتك مع البخيل هتبقى عن السخان اللي سبتيه شغال واللحمة اللي خلصت من التلاجة والنور وملكيش مصروف شخصي حتى لو كان ملياردير.. حياتك هتكون جحيم، وأنا بتاعة الفرعون الكبير الصغير لو جالي ملك جمال العالم وفيه كل الصفات الحلوة بس بخيل عيني مش هترمش ليه الحقي نفسك قبل ما تتجوزي احسن ما نقولك تتطلقي.

ياسمين عز: خليكي كتكوتة.. الست اتخلقت الدلع 

وسبق ووجهت ياسمين عز نصائح للفتيات عن تحمل المسؤولية، قائلة: لو بتفرضي شخصيتك وبتودي عيالك المدرسة والدروس وتصرفي انتي كدة خدتي دور الراجل فاستحملي اللي بيجرالك بعد كدة، عمري ما حبيت مصطلح ست بميت راجل.. جوزها بيعاملها أنه واحد صحبه.. خليكي كتكوتة وقطوطة وقولي مش عارفة افتح علبة النوتيلا فيحس برجولته... الست اتخلقت عشان تدلع، اوعي تعملي نفسك فيها جدعة وكل أما يقولك اعملي حاجة قوليله مش بعرف من غيرك يا قمري .. اديله وضعه هيكونلك بطل. 5 سنين اي اللي تضيعي عمرك عشان واحد فيم.. ولو حبيبك مخطبكيش بعد تالت مرة يشوفك فيها سبيه، الفرعون الصغير الكبير اللي بتكلم عنه هو اللي بيهنن ويدلع ومش بيقولك غير يا ملاك.

تفاصيل برنامج كلام الناس لـ ياسمين عز

يأتي برنامج كلام الناس في موسمه الجديد من الخميس إلى الأحد عبر شاشة قناة mbc  مصر في تمام الساعة السادسة مساءً، وتتحدث خلاله الإعلامية ياسمين عز في مختلف المواضيع التي تشغل المجتمع المصري وعلاقة الأزواج ببعضهما كما تستضيف ضمن حلقات البرنامج بعض المشاهير في مختلف المجالات، وتستضيف نجوم الفن حيث يحل عليها اليوم النجم خالد الصاوي ضيفًا وكانت استضافت قبله عدد كبير من نجوم الفن منهم باسم سمرة، فيفي عبده، نهي عابدين، وغيرهم عدد كبير من النجوم.